Tutti Siciliani nna st’elezioni? Ma quànnu mai?!

Un amicu m’incuntrau ajeri e mi dissi: “Ma chì fa, di sti tempi ‘un scrivi chiù nnô situ ‘i L’Àutra Sicilia?”.
Ci arrispunnivu: “Ai ragiuni, ma ‘u fattu è ca di sti tempi staju travaghiannu assai pi la campagna elettorali dû nostru Cicciu Pàulu Catania”.

Pinzànnuci bonu, ssa dumanna mi ni fici vèniri ‘n-menti nàutra: ma è giustu ca n’associazioni comu la nostra spenni lu so nomu nta na cumpitizioni elettorali, ammiscànnusi mmenzu a tutti l’àutri partiti?
E s’idhu è giustu, chì ci dicemu di fari a tutti li frati chi sunnu ‘n-Sicilia, mentri ca nuàutri semu prisenti sulu nna l’Europa?


Jamu propiu a la Sicilia, unni pari ca oji pènzanu tutti a la Sicilia?
Avemu progetti di fiscalitati differenziata, di sviluppo, tutti addifènninu (cu li palori) l’Autonomìa …a vìssimu a èssiri cuntenti ca li nostri battaghii addivintaru di tutti…
Lu fattu è ca, purtroppu, mentri nuàutri mittemu ‘n-circolazioni munita bona l’àutri spàccianu sordi fàusi…

Putìssivu diri “ma dùnni si vidi ca su’ fàusi?”; pi mia si vidi già di li sìmboli; lu sìmbolu ‘un è na formalità, è lu specchiu di lu programma. E poi si vidi di la realtà.
Accuminciamu cu li primi, e solu pi fari quarchi esempiu.

Lu Muvimentu pi l’Autonomia (l’acedhu, pi capìrinni) finìu pi stricari sutta a li pedi di lu surdatu lumbardu chi porta lu spatuni di “Alberto da Giussano”.
E sapiti chì vi dicu? Ca la Sicilia è stanca di stari a li pedi di l’Italia… Nun ni putemu chiù di lu fetu di sti pedi… Lu stissu Lombardo di matina dici ca è alternativu a la “casa di li libirtati (comu la chiàmanu idhi…)” e poi di sira si siddìa si “Forza Italia” ‘un ci a’ misu lu so candidatu nna la lista. Ma chì ci pari ca semu veru babbi?

L’àutru bedhu spicchiu (Musumeci), siccomi ‘un lu voli chiù nudhu, si mmintau di prisintàrisi pi la Rigiuni…
E nna lu fari chissu, ci fici scalari lu “giarnu” di la Sicilia nna lu sìmbolu (già era ammucciatu darreri a lu triculuri, comu si s’affruntava d’èssiri sicilianu, ora macari scalau) a menu di la mitati.

Putìssivu diri “ma chì t’apprechi cu li sìmboli?…” E allura taliamu la realtà: c’è sulu di chiànciri… Stà chiudennu tuttu ‘n-Sicilia; sulu lu pricariatu reggi…
Sapiti chì vi dicu? ‘Un sulu fìcimu bonu a prisintàrinni a L’Europa, l’avìamu a fari macari in Sicilia, e sta rivoluzioni l’avìssimu fatta cumpreta…
Ma ancora semu in tempu pi li pròssimi puntamenti… E tannu sì ca si vidi lu scrusciu ca nni la fidamu a fari…

Amici di l’Europa, Siciliani lìbiri, dàtici macari un diputatu e comu cu la leva di lu nostru Archimedi, vi jisamu lu munnu…

Antudo!

Fidiricu d’Aragona