Cari amici, ju nta la me drammaturgia e cummediografia parru sulu di dda Sicilia di li radici ancora non troppu antichi, overu di chidda bedda d”i nostri patri, quannu tra ‘i siciliani c’era rispettu, amuri e sintimentu. Parru d”a Sicilia di un tempu passatu non pirchì chista di oggi non è bona, ma pirchì ‘i nostri figghi di sta sucità muderna non su’ chiù allazzati a la radici mastra ca sfurnò ‘i megghiu siciliani di na vota.

Sti picciutteddi, ca su’ ‘i siciliani di dumani, non sannu nenti d”a storia antiriuri a chidda so, e forsi nenti volinu sapiri. Ci pari ca zoccu cuntamu nuàtri d”a tradizioni di un tempu è cosa di l’àutru munnu. È giustu accittari ‘u progressu, ma, pi mia, non c’è evoluzioni si’ si perdi ‘a propria appartinenza e dignità a li radici storicu-culturali d”a nostra terra di Sicilia. Ju penzu ca non si po chiù perdiri tempu, ca s’havi a tistumuniari a li novi siciliani ca si’ oggi hannu ‘a libirtà di fari zoccu ci piaci ‘u devinu suprattuttu a ddi siciliani “di l’àutru munnu”, a chiddi cc”u coriu surcatu d”a fatica e d”u suduri, e puru a tutti dd’omini e a tutti ddi fimmini di tri o quattru ginirazioni arretu ca, cc’’a loru educazioni, cc”u pristigiu d”a loru tradizioni, cc”u sacrificiu d’’a propria suffirenza e cc”a loru bona crianza, costrueru a nuàtri siciliani di oggi un futuru di citatini libiri.

Lassatimi diri ca la Sicilia è d”i veri siciliani, overu di ‘dda genti nicuzza, semplici e affittuosa, ca sapi amari la so terra supra ogni cosa e ca sapi gràpiri ‘a porta d”u cori e accogghiri c’amuri non sulu ‘i siciliani ma ogni omu. Li disonesti e i mafiosi, è veru, ci su’ sempri stati nti nuàtri e nascèru ‘n-Sicilia e oggi l’abìtanu ancora, ma non su’ veri siciliani; ‘i currutturi e ‘i tradituri ca s’arricchisciunu supra ‘i spaddi e ‘u suduri d”i nostri frati e d”i nostri soru, è veru abìtinu la Sicilia ma non su’ siciliani. Ogni omu e ogni fimmina ca manciannu d”i frutti di sta terra e ca s’abbiviranu a la sò funti, si’ non su’ grati a la Sicilia e non cummattinu p’addifinnilla d’ogni mali, abìtinu ccu nuàtri, è veru, ma non su’ siciliani!

Lu veru sicilianu apparteni a lu munnu e ‘u trovi unni e ghè, pirchi s’arricanusci di comu vivi e di comu parra. Iddu è comu ‘n-cucciddatu cunzatu: è càudu e chinu di sapuri; havi ‘a peddi ntrisa di sali finu, chiddu d”u so azzurru mari; usa l’ogghiu pi prufumarisi ‘i capiddi e la varva; ‘u pipispezzi ‘u tèni attrivitu e pimpanti; ‘u tumazzu ci duna pisu e sustanza, e l’aliva, janca e nira, ci culura ‘u carattiri.

‘A caratteristica chiù bedda è ca stu “pani cunzatu” diventa vita sulu quannu si sapi spàrtiri e si duna di manciari a cu’ è chiù affamatu o quannu si duna a cu’ è bisugnusu d’arti e di spiritu. E’ vita quannu diventa nutrimentu pi l’ospiti, pi l’amicu, p”u straneru, e suprattuttu p”u minnicu, ca è Diu ca nni visita.

Chistu, sicunnu lu me mudestu pareri, è ‘u veru sicilianu: ‘n-pani cunzatu di culuri e di sapuri! Guai a nuàtri dunca a non mittirici sali nta stu pani, a livarici l’ogghiu d’aliva e l’alivi janchi e niri; jittari ‘u tumazzu e livari ‘u pipispezzi, pirchì fussi na tragedia vidiri ca ‘u sicilianu, a picca a picca, ha sdignatu tutti ‘i so’ tradizioni, ‘a so’ storia, ‘i so’ sapuri e ‘i so’ culuri, pi ristari jancu, anonimu, senza facci e senza storia!

Alessio Patti (commediografu)