Palermu, 19 dicèmmiru 2005

Duminicadìa passata era cuntentu mentri vidìa la televisioni: lu nostru Cicciu Paulu Catania ridìa accantu a Sasà Salvaggio nna la trasmissioni di Simona Ventura…Dicìa: talè! Fìcimu na cosa c’arrivau a la televisioni… L’àutri c’ànnu fattu nzin’a st’ura?

Però mentri pinzava chistu c’era comu quarchi cosa chi mi distubava… quarchi cosa ca m’incuitava e dicìa, ntra di mia, “ma chì è?” e nun arriniscìa a capillu.

A ‘n certu puntu lu capivu: era la notizia di lu jornu prima ch’un mi vulìa lassari di camurriàrimi, la notizia ca lu Statu talianu ci avìa misu lu “segretu di Statu” supra a lu prucessu di la morte di D’Agostino.
Vuàutri putìssivu diri: ma chì è? Siti di giustizia pi lu Nostru Pòpulu e p’un casu umanu? Sì, sì, è chissu ma è suprattuttu nàutra cosa.

Lu fattu è ca penzu sempri a dhu mischinu di so patri chi nun si po dari paci, tantu ‘un si po dari paci ca dicisi di fàrisi crìsciri la varba nzinu a chi nun ci dìcinu cu’ fu ad ammazzari a so fighiu…
E ora, doppu tanti anni, arriva lu Statu e ci dici ca sta viritati nun si po appurari picchì … c’è un segretu di Statu.

Chì rabbia! Ma stu Statu chi metti lu segretu è veramenti lu stissu pi cui murìu D’Agostino?

Ma chì segretu è?

Ju penzu ca è lu segretu di Pudhicinedha: cioè lu fattu ca lu Statu talianu e la mafia sunnu alleati.
Sì, cari amici, sunnu alleati e ci ànnu statu sempri…

La mafia (comu la difinemu oggi) nascìu cu la binidizioni di Garibaldi ed a’ sirbutu sempri pi sottomèttiri la Sicilia. Forsi nna lu Fascismu lu Statu (chi era mafiusu idhu stissu) circau di fàrinni a menu, ma poi turnau a l’antica…

C’è picca di babbiari… cu’ nun lu capisci fa na mala fini…

E purtroppu prima nun era tantu meghiu…

Scusàtimi, ju sugnu anticu, e m’arricordu tanti cosi…

Li Borboni tìnniru la Sicilia pi chiossai di cinquant’anni nna la violenza e l’arbitriu.

Prima ancora java un pocu meghiu: avìamu lu nostru statu, avvilitu, malu cumminatu, c’un re furasteru, ma sempri un nostru statu..

Certu puru tannu c’èranu abusi, ma c’era puru dhu tannicchia di giustizia c’avìa supravvivutu di li tempi di lu Regnu Ndipinnenti e di lu Vespru ed era meghiu di nenti. Nzumma, avi 600 anni chi jamu sempri a scìnniri.

Ma ‘un ni putemu accurdari! La siti di giustizia e di libirtati jetta vuci sempri…

Chì diffirenza c’è tra l’abusu d’un baruni d’àutri tempi e chidhu di na cricca di pulìtichi-mafiusi di oggi?
Forsi ora è peju! Picchì c’è l’ipocrisìa ca la mafia fussi na “cosa nostra” … e mmeci è cummighiata propiu di lu stissu statu cintrali, comu e peju di secent’anni fa quannu li re spagnoli accuminciaru a cummighiari li vriogni siciliani.

Mi veni ‘n-menti na canzuna antica, s’un m’arricordu mali di lu stissu Quattrucentu chi dicìa daccussì:

“Un servu tempu fa di chista chiazza
‘cussì priava a Cristu e ci dicìa
Signu’ lu me patruni mi strapazza,
mi tratta comu ‘n cani di la via.
Tuttu si pighia cu la so manazza,
la vita dici ca mancu eni mia,
e chiù mi lagnu e chiù peju amminazza
cu ferri mi castìa a prigiunìa,
und’jeu vi preju chista mala razza
distruggìtila Vui Cristu pri mia.

E Cristu ci arrispunnìu:

E tu forsi chi ai ciunchi li to vrazza?
O puru l’a’nchiuvati comu a mia?
Cui voli la giustizia si la fazza,
ne speri c’àutri la fazza pri tia.
Si tu si’ omu e nun si’ testa pazza
metti a prufittu sta sintenzia mia:
Jeu nun sarìa supra a sta cruciazza
s’avissi fattu quantu dicu a tia,
cui voli la giustizia si la fazza
ne speri c’àutri la fazza pri tia.”

Chì vi voghiu diri? St’antica canzuna mi fici arrizzari li carni! Pinzavu a quanta dispirazioni e violenza app’ad assuppari stu Pòpulu cu la ligi e lu dirittu niati pi sempri, tantu niati ca nun avìanu rizzettu e confortu mancu di la riligioni stissa..

Ma lu patruni è cu’ ni guverna e la giustizia la putemu fari sulu nuàutri cu la nostra rivolta morali…
Nuàutri ci avìssimu a diri a stu Statu c’un si pirmittissi chiù di cummighiari la morti di li so fighii…
E intantu a lu Signo’ D’Agostino ci crisci la varba… ma s’idhu, a lu postu d’idhu, ci fussi lu Pòpulu Sicilianu, quantu sèculi di varba avìssim’ad aviri?

Viva la Trinacria! Viva lu Vespru! Viva la Sicilia!

Fidiricu d’Aragona