Li vriogni di l’Italia

Lu vidìstivu zoccu dicìsiru li jùdici di lu palluni pi li squatri taliani c’avìanu truccatu lu campiunatu di palluni?
Chì vi ni pighiati?
E poi semu nuàutri li mafiusi d’Italia?
A mia mi pari ca a ura di pìcciuli ‘un si talìa ‘n-facci a nudhu!
Chì n’avìssiru fattu si sta me… l’avissi fatta lu Palermu o lu Catania o lu Missina?
Vi lu dicu ju: n’avìssiru cancillatu pi sempri di tutti li campiunati…


Dici ma … “l’Europa s’av’a cunquistari supra a lu campu e no cu li liti…”. Ma pirchì? Lu Milan supra a quali campu si la cunquistau? Supra a chidhu di lu palluni chiù ngrasciatu di lu munnu? Ma pi piaciri!…
Dici ma … ” ‘un ti la pighiari cu l’Italiani pirchì macari Zamparini è italianu”. Ma cù’ è chi si la pighia cu l’Italiani? Sarrìa un sbaghiu enormi! E’ stu sistema talianu schifiatu di putiri c’un servi, lu stissu ca misi a lu putiri in Sicilia quattru dilinguenti (la “mafia”) pi poi diri ca l’avemu nna lu DNA… L’italiani (e tutti l’àutri pòpuli) su’ frati e Zamparini è lu binvinutu pirchì ci vitti bonu cca…E poi Siciliani ‘un si nasci: è Sicilianu cu’ si senti sicilianu, cu’ cridi nna la Sicilia e la porta avanti.

Anzi ca lu Missina potti acchianari in seri A…
Nonostanti tuttu ci sunnu tri squatri siciliani e chistu ‘un avìa mai succidutu.
E allura … facemuccilla a tutti quantu un cappedhu ‘i parrinu e “cu’ un sàuta cuntinintali è”!
Lu munnu l’av’a sapiri quantu vannu li Siciliani!

Ah! Nàutra cosa! Sti purcarìi ricurdamunnilli puru quannu jamu a vutari!

Antudo!

Fidiricu d’Aragona